Traffico.... xe longhi!

I problemi del trafico, eco come che xe de far per risolverli.
Sior Sindaco, la me stia a scoltàr: qua a Trieste xe ssai problemi col trafico, xe robe ufo, robe de no creder, qua no se pol ndàr vanti in stà maniera, lei che la xe sindaco la ga de ciapàr in man la situaziòn e risolver. Eco come che la ga de far:

1. La cavi iautobus che i intriga e i fa file de drio de lori. La meti presempio che un gabi de ndar zò per via Picardi. Bon, xe sicuro come la morte che el se trova davanti la coriera che indrioman la se incioda perché no la riva passar per via che xe qualche furgon postegiado con do rode sul marciapie chel scariga strafanici, cassete, scartozi, cossa so mi. Ecolo, se no ghe fossi l’autobus che nol riva passar perché el xe grando, iauti andaria avanti lissi e no ghe saria file. La capissi come? Bon, la cavi iautobus, xe l’unica, la me scolti a mi.

2. Cò xe el semaforo rosso, le motorete ga de star davanti de tuti a spetar el verde, me par logico. Solo che desso, per rivar davanti de tuti, ghe toca far slalom tra iauti in colona, star tenti dei speceti, qualche volta perfina meter zò el pie, insoma xe longhi. Alora lei la ga de lassar che quei con le motorete vadi su pei marciapie che xe bel drito fin el semaforo, senza tanto intrigarse fra iauti e che quei che va a pie pel marciapie che camini sui marciapie andove che no xe semafori che se no xe semafori no xe gnanche motorete. Me par cussì ovio che no capisso come che nissun gabi pensado prima.

3. I semafori per quei che va a pie noi servi, la li cavi via. Tanto, cò xe verde i passa, co xe rosso i dà un’ociada e i passa lo stesso, indiferente se riva qualchidun o no, tanto i sa che no te li pol butàr soto che se no te va in longhi ti, anzi i te varda come per dir: “bùtime soto mona che voio veder, che dopo te me paghi novo”. Alora la li cavi che cussì se sparagna la corente e se proprio la vol inveze del semaforo la meti per quei che va a pie un cartèl con piturado sora un grando ocio e soto scrito “Prima de traversar, dar un’ociada!” e per quei che va in auto un altro cartel con piturado un che traversa e che te varda con strafotenza con soto scrito “Ocio va piàn che qua i dà solo un’ociada”.

4. La ghe cioghi via la patente ai veci che guida col capèl in testa. Sa tuti che se te ga davanti un che guida col capèl te son finido, che più dela seconda nol meti e el va vanti stile pissada de can cussì che no te vegni inamente de sorpassarlo. Se po’ buta caso el ga sentada vizin la moglie che se ga 'pena fato la messinpiega, coi cavei gonfi de quel color tipo viola ciaro, la ga presente, alora vol dir sicuro che el va in Istria a trovar parenti. Xe per quel che xe caligo de trafico in via Flavia che i disi anche per radio, cossa la pensa, perché xe sicuro un vecio col capèl chel va in Istria!

5. Un grando problema pel trafico xe quei in dopia fila, inspecialmodo quei in dopia fila sentai in machina col finestrin serado e che i varda fisso drito davanti per no sentir e no vedèr quei che i passa e che ghe ziga e che i li manda in mona. Sicome sti qua sta in dopia fila anche se xe posto in prima fila, no go mai capido perché ma xe cussì, lei la devi cavar la prima fila che tanto no i la dopra e in te la prima fila la fazi passar iauti che desso passa de l’altra parte che però xe strento perché xe sti qua in dopia fila, cussì tuti xe contenti e no i se manda più in mona! La ga capido come? Se no ghe fazo el pupolo, ghe lo mando per facs.

Bon, dopo gaverò altre robe de dirghe de far pel trafico, ma intanto la fazi ste qua che saria za qualcossa e dopo vedaremo, se la sarà bon de far ghe dirò anca le altre.

Ah, che no me dimentico, mi no me interessa de farme publicità, no ocori che la disi che ghe go dito mi cossa far, la disi pur che la se ga pensado lei tute ste bele robe, la xe lei sindaco, miga mi!