Al sindaco de Trieste

Alora Sindaco, lei la devi contentar i triestini che se lamenta sul blog, se no cossa la fa là che la xe!
Per sua comodità ghe fazo a gratis el riasunto del quel che la devi far:

1. Serar la Feriera, subito, doman matina la devi meter cadenazi col lucheto e po' bon. Cossa mai far carte, spetar magistrature, ministeri, arpe, serar la devi e se no xe legale fa gnente, triestini ga dito e lei la devi far.

2. Cavar i chioschi de Barcola, che la gente ghe da fastidio co i camina, inveze che andar driti ghe toca far un toco de sbiego sul marciapie, no se ga mai visto de nissuna altra parte che tochi far una roba del genere: la cavi.

3. Meterghe multe a tuti per el divieto de sosta meno che soto casa de lori, che la i pol che se no andove i parchegia che no xe posto.

4. A Barcola la devi meter più scalete per andar in acqua, no che un ghe tochi far diese o magari dionovolessi quindise metri de ndove che el gà el sugamàn per poder far un toch.

5. Far piste ciclabili ma no sui marciapie che le intriga, gnanca sula strada che za le xe strete, no dove che xe la riva in su che cossa la vol che morimo a pedalar in salita, insoma la le fazi, cossa devo dirghe mi dove, no son miga sindaco mi.

6. Le tasse, la devi cavar le tasse che la gente no ga soldi per pagar, xe miseria, avanti de sto passo no i poderà gnanca portar ogni giorno i fioi davanti a scola col gipòn zinquemila de cilindrata, o forsi i poderà ma ghe tocherà studar el motor per sparagnar benzina intanto che el fio smonta. Lei che la xe sindaco no la pol permeter disgrazie compagne!

7. Xe sporco per tuto, cossa no la vedi, la se pensi che giusto ieri go butà in graia in giardin de via orlandini el mio vecio stramazo, ben, ogi el xe ancora là e nissun ga netado! Anca le botilie rote, bicieri, carte, pacheti de sigarete che i nostri fioi buta per tera, i scovazzini stenta a ingrumar. Cossa i pensa, che ghe disemo a fioi de no butar?? Cossa i xe mati, miga i volerà che li traumatizemo coi divieti che dopo ghe vien i complessi, no?

8. I'autobus, sior sindaco, i'autobus! La se pensi che una volta go spetado la dicianove sei, digo sei minuti e sula tabela iera scrito che la saria rivada fra zinque minuti. Cossa xe serietà questa? La vardi che i triestini paga el bilieto la sa? Bon, magari no tuti, ma se no i paga sarà sicuro un bon motivo. La fazi qualcossa, che i triestini xe stufi e la ghe disi ai autisti che i vadi pian che se no se scassemo tuti, ma no tropo pian che gavemo anca furia e che i studi i condizionatori che ne fa malar, che i tegni i finstrini seradi che se no fa giro de aria, ma che no sia caldo, no semo miga bestie!

9. La devi studar i rumori. No devi esser rumori, che dà fastidio. Qua la gente ga de riposar, ga de star in pase inveze ghe toca sentir musiche, muleria che ciacola, motorini che sfrecia, perfina gente che lavora che no se pol più de lori, cossa proprio qua i ga de lavorar??? Però no devi gnanca esser una zità morta la sa? Ghe vol manifestazioni, feste che vegni i turisti, no che sia un deserto zà ale undise de sera. Insoma, far feste ma in zito e far parchegi soto tera, ma senza scavar, e che i sia gratis.

10. Roba più importante: lei no la devi far gnente se prima no la ghe ga domandado ai triestini. La vol spostar monumenti, far ponti, cambiar una piaza, meter novi lampioni, asfaltar un marciapie, bever un bicier de bianco, spostar un cassonetto? La ghe devi ben pulito domandar ogni volta, spiegarghe ben, mostrarghe el pupolo - disegnar un bicier de bianco no xe dificile - e sentir se ghe va ben.
Se ghe andarà ben, ma devi esser dacordo tuti e co digo tuti intendo tuti, alora forsi la poderà far, ma lo stesso mi speteria ancora un poco perché magari dopo un sie mesi vien fora qualchidun che no ghe ndava ben ma che no gaveva dito perché quel giorno che iera de dir el scriveva ale Segnalazioni per via che el late che vendi siora Jole soto casa costa 2 centesimi più che ala Pam e che no el comprerà più de siora Jole e comunque in Friul costa de meno per no parlar dela Jugo. Bon, insoma, la me scolti a mi, no la stia far gnente, ma anche per no far gnente la ghe domandi ai triestini se ghe va ben che no la fazi gnente e, sopratuto, la ghe mostri el pupolo.

Eco, mi calcolo se le farà come che i triestini vol e che mi ghe go riasunto, la gente smeteria de lamentarse. Ma dopo i se lamenteria perché no i ga più de cossa lamentarse e che xe colpa sua de lei, sior sindaco, che la ghe ga cavado i motivi per lamentarse e che se stava meio prima.
E qua no so più cossa dirghe, la devi veder lei, la sarà pur sindaco per qualcossa, no?

Grazie a: Xe meio un biciér de dalmato.

Continua qui...

Traffico e bikelift a Trieste

Mille idee per eliminar el trafico, i slarga strade, i fa rotonde, i fa ponti sul canal, parchegi a pagamento a ufete anche a Cattinara porc.. vac.. i ga butado zo la bianchi per far posto a 4... no scusa 5 machine, volevimo el waterfront libero che figada, ma el magazin vini el xe la tutelado dalle belle??? arti, parcheggi soto acqua... bu? Metropolitana legera, busoni che cori tra prosecco e piazza unità (fantascienza che però i xe ancora drio a discuter), quindi anche mi son giustificado a dir la mia.
Se pronti? Tegnive duro! Ecola, femo un bikelift... si, un pochi de bikelift!
Cosa che xe un bikelift? Praticamente un skilift per biciclete.


Per andar in cita no xe problemi tuti in piena zo per vicolo scoglietto stando atenti a no capotarse, in centro giremo ben, tanto xe tuto drito, dopo per tornar casa, a san giacomo, a servola, a cattinara a opcina.... nesun problema se tachemo al cavo e via, el bel xe che andando in bici no cori far benza alla macchina, ma noi podemo carburarse visti i tempi "duri" per noi che lo semo sempre!

Quindi.... bici, casco e caliceti a nastro !!

Va ben, va ben... me buto in acqua, xe palese che go ciapado tropo sol!!!

Continua qui...